ನೀ ಕನಸಲ್ಲಿ ಬಂದಿದ್ದೆಯೆಂದೇ
ನೋಡಲು ಬಂದದ್ದು
ಅಲಂಕಾರ ತೆಗೆದಾಗ
ಬರೀ ಒರಟು ಕಲ್ಲು ನೀನು
ಹೆಳವ, ರಂಗ ನಿಂಗೆ ಕಂಡದ್ದಾದರೂ ಹೇಗೋ
ಆ ಕಪ್ಪು ಒರಟು ಕಲ್ಲಿನಲ್ಲೆಲ್ಲಿಯದು
ಆ ವೈಕುಂಠ, ಸಾವಿರ ಹೆಡೆಯ ಸರ್ಪ
ಹೊಕ್ಕುಳಲ್ಲಿದ್ದ ಕಮಲವೂ
ಅದರೊಳಗೆ ನಾಲ್ಕು ಮುಖದ ಬೊಮ್ಮನೂ
ಚಂದದಾ ಲಕುಮಿಯೂ
ಅಲ್ಲೇ ಪಕ್ಕದಲ್ಲೇ
ಹೆಳವಾ, ಆ ಕಣ್ಣನ್ನೆಲ್ಲಿ ಪಡೆದೆಯೋ
ಕಲ್ಲ ಭಾಷೆ ನಿನಗೆ ಕೇಳಿಸಿದ್ದಾದರೂ ಹೇಗೆ
ಅದ ಮಾತನಾಡುವುದಾದರೂ ಹೇಗೆ
ಬಿಳೀ ದಾಸವಾಳ ನನ್ನ ಕೈಲೂ ಇದೆ
ನಿನಗೇ ಕೊಡುತ್ತೇನೆ
ಕಲಿಸುತ್ತೀಯ
ಕಲ್ಲ ಭಾಷೆಯ
ಕವಿಯಾಗಿ ಪ್ರತಿಮೆಗಳೊಟ್ಟಿಗೆ
ಸೋತ ಹಾಗಾಗಿದೆ
ಒರಟು ಕಲ್ಲಲಿ
ಕಲ್ಲನ್ನ ಕಾಣ್ವಂತೆ
ಆ ಕಲ್ಲ ಮಾತ ಕೇಳ್ವಂತೆ
ಅದರೊಟ್ಟಿಗೆ ಹರಟೆ ಹೊಡೆವಂತೆ
ಮಾಡೋ ರಂಗನ ಕಂಡ
ಹೆಳವನಕಟ್ಟೆಯ ಹೆಳವ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ