ಬಂದಂದಿನಿಂದ ಇದ್ದಲ್ಲೇ ಇದ್ದ
ನಾಗಮಲ್ಲಿಗೆ ಮರ
ಹಚ್ಚ ಹಸಿರಾಗಿ
ಬಿಳೀ ಹೂವ್ಗಳಾಗಿ
ಬೆಳಗಾದದ್ದೇ
ಕಡು ಕೆಂಪಾಗಿದೆ
ಹೂ ಉದುರಿದೆ
ನಾಗರ ಸದ್ದು
ನಾ ಹೂವಾಗಿದ್ದೇನೆ
ನೀ ಮುಡಿಯಬಹುದು
ಅಥವಾ
ಹೊಕ್ಕುಳಿಗಾಕಿಕೊಳ್ಳಬಹುದು
ಬೇರಿಳಿದು ಒಳಗೆ
ನಾಗಮಲ್ಲಿಗೆಯಾದೀತು
ಎಷ್ಟಾದರೂ
ಉದರದೊಳಗೆ ಬ್ರಹ್ಮಾಂಡವನ್ನೇ
ಇಟ್ಟುಕೊಂಡವಳಲ್ಲವೇ
ಮಟ ಮಟ ಮದ್ಯಾಹ್ನದಲ್ಲಿ
ಕೆರೆಯಂಗಳದಲ್ಲಿ ನಿಂತು
ನೀರನ್ನೇ ದಿಟ್ಟಿಸುತ್ತಿರಬೇಕಾದರೆ
ನಾನೇ ನೀರಾದಾಗೆನಿಸಿ
ಸೋಶೋ ನೆನಪಾದ
“ನಾ ಚಿಟ್ಟೆಯಾದ ಕನಸ ಕಂಡದ್ದೋ
ಚಿಟ್ಟೆಯೇ ನಾನಾದ ಕನಸ ಕಂಡದ್ದೋ "
ಹಾಗಾಗಿ
ನಾನು ನೀರ? ನೀರೇ ನಾನ?
ಸುಡು ಬಿಸಿಲು ರಣ ಬಿಸಿಲು
ದೇಹ ಸುಟ್ಟು ಕರಕಲಾಗಿ
ಸುಡುಗಾಡ ಬಗಲಲ್ಲಿ
ಮೈಯೆಲ್ಲಾ ತಂಪಾಗಿ
ಕಾಳೀಯ ಮುಖ ಕಂಡೆ
ಹೊಳೆವ ಮೂಗುತಿ
ಪುಟ್ಟ ಮೂರುತಿ
ಕುಣಿತದಾಟ ಮುಗಿಸಿ ಬಂದ
ನಗುವಿನಲ್ಲಿ
ತಿರುವಲಂಗಾಡಿನಲ್ಲಿ
ಅವನದೊಂದು ಕಾಲು ನೆಲವ ಕಂಡಿದೆ
ಮತ್ತೊಂದಾಗಸದೆಡೆಗೆ ಚಾಚಿದೆ
ಕಣ್ಮುಚ್ಚಿದಾಗ ಕರೆದವರಾರು
ಹುಡುಕಾಟಕ್ಕೆ ಕಾರೈಕಲ್ ಅಮ್ಮಯಾರ್ ಸಾಕ್ಷಿ
ರೂಪವು ದೇಹವನೊಕ್ಕಿ
ಅರಸುತಿದೆ
ಸಂಖ್ಯೆಗಳೂ ಸಹ ಚಿತ್ರಗಳು
ಮನುಷ್ಯ ಪ್ರಾಣಿ ಮರ ಗಿಡ
ಹೀಗೆ ಚಿತ್ರ ಬರೆಯುತ್ತಾರಲ್ಲ
ತೇಟ್ ಹಾಗೆಯೇ
ಚಿತ್ರಗಳು ಭೌತಿಕ ಸಾಧ್ಯತೆಗಳು
ಛಂಧಸ್ಸು - ಮೇಲೊಂದು ಗೆರೆ ಕೆಳಗೊಂದು
ಚಿತ್ರವೇ ಅದು
ರಾಗವಿನ್ನೇನು ಮತ್ತೆ
ಕಡೆಗೆ ಧ್ವನಿಯೂ ಶಬ್ದವೂ
ದೇಶಕಾಲವು ಜ್ಯಾಮಿತೀಯ ಆಕಾರ
ಬ್ರೆಡ್ಡಿನ ಪದರಗಳಂತೆ ಒಂದರ ಮೇಲೊಂದು
ಅದೂ ಸಾದ್ಯ - ಹಾಗಾಗಿ ಅದೊಂದು ಚಿತ್ರ
ಮುಂದೆ ಹಿಂದೆ ಆಗ ಈಗ ಅಲ್ಲಿ ಎಲ್ಲಿ