ಕೆಂಪು ಮಣ್ಣ ರಾಶಿಯಲ್ಲೆದ್ದ
ನೀಲ ನಕಾಶೆಯ ಸುತ್ತೆಲ್ಲಾ
ಬರೀ ಬಿಸಿಲ ಜಳ
ಕೆಂಪು ಕೆಂಡದ ಬೆಟ್ಟದ
ಬುಡದಲ್ಲಿ ಕಾಣಬೇಕಿತ್ತು
ಈ ಸಂಪತ್ತು -
ಕಟ್ಟಡ, ರಚನೆ
ಆರಂಭಕ್ಕೆ ಕಲ್ಲು ನಾಟಿದ್ದು
ಚಿಗುರುವುದಿಲ್ಲ
ಬಂಗಾರ ಬಣ್ಣದಿಂದ ಯಾವುದೋ
ಗೋಡೆಗಲಂಕಾರ
ತುತ್ತ ತುದಿಯ ಮಹಡಿಯಲ್ಲಿ
ಕೂತಿದ್ದಾಗ - ಮಳೆಯೋ ಮಳೆ
ಕೆಂಡದ ಬೆಟ್ಟ ಕೆಂಪಾಗಿ ಹರಿದಿದೆ
ಕೆಂಪು ನೀರು ಕುಂಡ ಸೇರಿ
ಕಲ್ಲು ಚಿಗುರ ಹತ್ತಿದೆ
ಕೆಂಪು ಬೆಟ್ಟಕ್ಕೆ ಹೊದಿಕೆ
ಬಣ್ಣ ಬಣ್ಣದ ಹಕ್ಕಿ ಪಿಕ್ಕಿ ಪ್ರಭೇದ
ಎಲ್ಲವನ್ನೂ ಹಿಡಿದೆನೆನ್ನುವ
ಮಕ್ಕಳ ತಾಯ್ನುಡಿ ಬೆರೆತ ಆಂಗ್ಲಭಾಷೆಗೆ
ಕಟ್ಟುವುದು ಸುಲಭವಲ್ಲ ಸಂಕೀರ್ಣ
ಎಂದದ್ದಕ್ಕೆ ವಿಕಾಸವಾದದ ಪಾಠ ನಡೆದಿದ್ದಾಗಲೇ
ನಡುವೆ
ಭೂಮಿ ಬಣ್ಣವು ಆಕಾಶದಲ್ಲೋ
ಆಕಾಶದ್ದು ಭೂಮಿಯಲ್ಲೋ
ತಿಳಿಯದೆ ನವಿಲು ಕೂಗುತ್ತಿತ್ತು
ನಿಮ್ಮದದೇ ಗಟ್ಟಿ ಧ್ವನಿ
ಪಳ ಪಳ ಹೊಳೆವ ಕಣ್ಗಳು
ಇಳೆ ತಂಪಾಗಿದೆ
ಎಲ್ಲೆಲ್ಲೂ ಹೂವ ತೋಟ
ಮಕ್ಕಳ ಕಲರವದಾಟ
ಕೆಂಡದ ಬೆಟ್ಟವೂ ಜೊತೆಯಾಗಿದೆ
ಆಡಲಿಕ್ಕಿಲ್ಲಿ ಕುಣಿಯಲಿಕ್ಕಿಲ್ಲಿ
ಆರಂಭಕ್ಕೆ ಶುಭವಾಗಲಿ ….