ಅನುತ್ತರ ಲೇಬಲ್‌ನೊಂದಿಗೆ ಪೋಸ್ಟ್‌ಗಳನ್ನು ತೋರಿಸಲಾಗುತ್ತದೆ. ಎಲ್ಲಾ ಪೋಸ್ಟ್‌ಗಳನ್ನು ತೋರಿಸಿ
ಅನುತ್ತರ ಲೇಬಲ್‌ನೊಂದಿಗೆ ಪೋಸ್ಟ್‌ಗಳನ್ನು ತೋರಿಸಲಾಗುತ್ತದೆ. ಎಲ್ಲಾ ಪೋಸ್ಟ್‌ಗಳನ್ನು ತೋರಿಸಿ

ಅನುತ್ತರ

 [ಅನುತ್ತರ : ಗುರು ಅಭಿಧ ಜೊತೆ ಅನುಭವಿಸಿದ ಅನುಭವವಿದು. ಬರೀ ಅನುಭವಗಳು. ಒಂದೊಂದೂ ಸ್ವತಂತ್ರ್ಯವಾದದ್ದು, ಸೇರಿಕೊಂಡದ್ದು, ಹಾಗೇ ಉಳಿದದ್ದು. ]

 

೦೧

ಪಂಚಮಗಳೊಂದಿಗೆ ಧ್ಯಾನ 

ಇರುವು ಮಾಂಸದ ದೇಹ 

ಮದ್ಯವು ಮತ್ತು

ಮತ್ಸ್ಯವು ದೇಹದಲ್ಲಿರಿವ ಪ್ರಾಣ 

ಮುದ್ರೆಯು ನಾನಿಲ್ಲದ 

ಅವಳಾದ ಅವಸ್ಥೆ 

ಮೈಥುನವು  ಮಹಾ ಮುದ್ರೆ  

 

೦೨ 

ಅದೆಲ್ಲವೂ ನಾನೇ 

ನಾನೇ ಅದೆಲ್ಲವೂ 

ಅದುವೆ ಭಕುತಿ 

ಅದುವೆ ಭಾವನ 

ಅದುವೆ ಶ್ರೀಗುರು 

 

೦೩  

ಭಾವನ ಎಂಬೋ ಭಕ್ತಿ 

ಎಲ್ಲದರೊಳು ಕಾಣ್ವ ಸ್ಪಂದ 

“ಚೈತನ್ಯಂ ಆತ್ಮ” 

ಕಾಣ್ಕೆ, ಕಂಡದ್ದು, ಕಂಡವನು 

ಮೂರೂ ಒಂದೆ 

ಗುರು ವಾಕ್ಯ 

 

೦೪. 

ಭೈರವಿ ಕಂಡಳು 

ಅದೆಷ್ಟು ದೊಡ್ಡ ಹಾವದು 

ಕೆಳಗಿಂದ ಮೇಲೆ ಚಾಚಿತ್ತು 

ಮೈಯಲ್ಲಾ ಬಿಸಿಯಾಗಿತ್ತು 

ತೀವ್ರ ಪ್ರಜ್ಞೆಯ ಸಾಕಾರ  

ಎಂದಳವಳು -  ತ್ರಿಪುರ ಭೈರವಿ 

 

೦೫ 

ಮಣಿಕರ್ಣಿಕದಲ್ಲಿ 

ಉರಿಯುತ್ತಿರುವ ದೇಹ ಕಂಡೆ 

ಹಿಂಬದಿಯಲ್ಲಿ 

ಉರಿವ ಮಶಾನ  ಶಂಕರ ಕಂಡ 

ಮುಂದೆ ನದಿಗುಂಟ ನಡೆದೆ 

ಶಿವನು ಕಂಡ 

ಶಿವಾನುಭವ 

ಶಿವವಾಯಿತು 

 

೦೬ 

ಹಣೆಯ ಮೇಲೊಂದು ಕಾಲು 

ಎದೆಯ ಮೇಲೊಂದು ಕಾಲನಿಟ್ಟು 

ನನ್ನ ಮುಖವ ಕಂಡಳು 

ಅವಳು ಮುಖವ ಕಂಡಳು 

ಅವಳ ಕಣ್ಣಲ್ಲಿ ಕಣ್ಣ ಕಂಡೆ 

ನನ್ನ ಕಣ್ಣು ಅವಳದಾಯಿತು 

ಎಲ್ಲವೂ ಮಂತ್ರವಾಯಿತು 

 

೦೭. 

ಕತ್ತರಿಸೆಂದೆ 

ಕುಡುಗೋಲಿನ ತುದಿಗೆ 

ಗಂಟಲ ಸೀಳಿ 

ಮಾತಂಗಿ ಚಾಂಡಾಲಿ

ಮಾತು ಆಡಲೂ ಬೇಕು 

ಸುಮ್ಮನಿರಲೂ ಬೇಕು 

 

೦೮. 

ಎದುರಿಗೆ ಬಂದಿರಿ 

ಏನೇನನ್ನೋ ಹೇಳಿದಿರಿ 

ನೆನಪಲ್ಲಾವುದೂ ಉಳಿಯಲಿಲ್ಲ 

ಉರಿವ ಬೆಂಕಿ ರೂಪದಲ್ಲವಳು 

ಬಂದಳು, ನಿಂದಳು, ಹೊಕ್ಕಳು 

ಅವಳನ್ನ ಕಾಣಬೇಕು 

ಅವಳ ಮಾತ ಕೇಳಬೇಕು 

ಅವಳೊಟ್ಟಿಗೆ ಹರಟೆಯೊಡೆಯಬೇಕು 

 

೦೯. 

ಆ ಒಂದು ಆಕಾರದ ದರ್ಶನಕ್ಕೆ 

ಏನೂ ಇಲ್ಲದ್ದು ಮೊದಲಿದ್ದದ್ದು 

ಇರುವುದು ಮತ್ತೆ 

ಏನೂ ಇಲ್ಲದೆ ಇರುವ 

ಏನೂ ಆಗದೆ ಇರುವ 

ಒಂದನುಭವ 

ಅಲ್ಲಿ ಯಾರೂ ಇರಲಿಲ್ಲ 

  

 

 

...

 

ಮಲಗಿದ್ದ ಹಾಸಿಗೆಯ ಮೇಲೆ ಹಾಕಿದ್ದ 

ಚಾದರದ ಮೇಲಿನ 

ಬಣ್ಣ ಬಣ್ಣದ ಹೂವು ಮೊಗ್ಗು 

ಎಲೆ ಹಸಿರು - ನಿಜವಲ್ಲ 

ಕಣ್ಮುಚಿದ್ದಷ್ಟೆ 

ದೇವರು, ಕಿರೀಟವೇ ಇಲ್ಲ 

ದೇವಿಯೂ, ಹಲವರು ಕೈಗಳು 

ಕೋಟೆಗೆ ಹೊತ್ತ ಕಲ್ಲುಗಳು 

(ಮಾತಾಡುತ್ತಿದ್ದವು … ) 

ಮರಕ್ಕೆ ಹಬ್ಬಿದ ಬಳ್ಳಿಯಲ್ಲರಳಿದ ಹೂ 

ಕೆಳಗೆಲ್ಲೋ ರಕ್ತದ ಕೋಡಿ 

“ಮುನ್ನಾ, ಮುನ್ನಾ, ಮುನ್ನಾ…” 

ನಂತರದ್ದೂ ಇದೆ 

ಹೆಣ್ಣು ಎಲ್ಲಿ ನೋಡಿದರಲ್ಲಿ 

ಅದೇ ಬರಡು ಭೂಮಿ 

ಹಸಿರು ನೆಲ ಜೋರು ಮಳೆ 

ಎಲ್ಲವೂ 

ಹರಿದು ಹೋದವು ಹಾಗೇ 

ಎಲ್ಲಿ ಯಾರಲ್ಲಿ? 

ಕೇಳುವವರಾದರೂ ಯಾರು?

ಹೊದ್ದ ಚಾದರವೆ ? ಅದರ ಬಣ್ಣವೆ ? 

    


ವಾರಣಾಸಿ

 


ಇದೊಂದು ಮಹಾ ಸ್ಮಶಾನ 

ಹಗಲು ಕಾಯುವವನು ಆ ಕಾಲ ಭೈರವನು 

ರಾತ್ರಿಗೆ  ಬರುವಳಮ್ಮ 

ಆ ವರಾಹಿ ತಾಯಿಯು 

ಕತ್ತಲೆಯಲಿ ಕಾಯುವವಳು 

ಕತ್ತಲಾಗಿ ಪೊರೆಯುವವಳು 


ಕಣ್ಣದೊಂದು ವಿಶಾಲ 

ಕಾಣುವುದೆಲ್ಲಾ ಅದರ ಬಗೆಯೂ 

ಕಾಣದಿರುವುದದರ ಬಗೆಯು 

ದಂಡಪಾಣಿ ಹಿಡಿದ ದಂಡ 

ಕೆಳಗಿನಿಂದ ಮೇಲಕ್ಕೆ 

ದುಂಡಿರಾಜ ಕೂತನಂತೆ   

ಹೋ ಹೋ ನಗುತ್ತಾ 


ಎಲ್ಲಿ ಕಂಡರಲ್ಲಿ ಚೆಲುವು 

ಆ ಬಿಂದುವಿನಿಂದ ಬಂದ ಸೊಗವು 

ಮಾಧವನೋ ಮಾಧವಿಯೋ 

ಹರಿವುದದನು ಕೇಳು ಮತ್ತೆ 

ಆ ಹರಿಯನು ಕೇಳು ಮತ್ತೆ 


ತೈಲಿಂಗನು ಕೂತನಲ್ಲಿ 

ಎದುರಿಗಿರುವಳು  ಮಹಾ ಕಾಲಿ 

ಆ ಕಲ್ಲ ನಂದಿಯ 

ಕಾಲ ನೇವರಿಸಿದರು 

ಕೊರಳ ಮುದ್ದಿಸಿದರು 

ಹೇಗಿರುವೆಯೋ ನಂದಿ 

ಜೀವ ಕರಗುವಂತೆ 

ಕೇಳಿದರವರು 

ಲಿಂಗವಾ ಮೀರಿದ ತೈಲಿಂಗ ಸಾಮಿಯು 


ಅನ್ನವಿದೆಲ್ಲ 

ಅನ್ನವೇ ಅನ್ನವ ತಿನ್ನುವುದಿಲ್ಲಿ ಎಲ್ಲ 

ಅನ್ನವೇ ಪೂರ್ಣವಿಲ್ಲಿ ಅನ್ನ ಪೂರಣಿ 

ಹೊತ್ತಿಸಮ್ಮ ಉರಿಸಮ್ಮ 

ಕೆಳಗಿನಿಂದ ಮೇಲಕಿಲ್ಲಿ 

ಓ  ತ್ರಿಪುರ ಭೈರವಿ 

ಎಲ್ಲವನೂ ಕಟ್ಟಿನಿಂದ ಕಟ್ಟಿಟ್ಟು 

ಬಚ್ಚಿಟ್ಟವಳು ನೀನಲ್ಲವೇ ದುರ್ಗಿಯಲ್ಲವೆ 


ಇದೊಂದು ಮಹಾ ಸ್ಮಶಾನವೆಂದೆ 

ಅದಕೆ ನೀನು ಒಡತಿಯೆಂದೆ 

ಸುಂದರಳಲ್ಲವೇ 

ಮೂರು ಪುರದ ಸುಂದರಳಲ್ಲವೇ 

ಕಾಲಿಯಲ್ಲವೇ 

ಮಹಾ ಸುಂದರ ಕಾಲಿಯಲ್ಲವೇ


ವಾರಾಹಿ : ಒಂದು ಹಾಡು

 


ಮುದ್ದು ಮುಖದವಳೇ ಕಾಡಂದಿ ಮುಖದವಳೇ 

ಪುಟಾಣಿ ಮಗುವು ನೀ 

ಕೋರೆ ಹಲ್ಲು ಕೆಂಪು ಕಣ್ಣು 

ನೋಟವೆಲ್ಲ ನನ್ನ ಮೇಲೆ 

ಅಪ್ಪಿ ಕೊಂಡು ಕೂಸು ನೀನು 

ಆ ಮಗುವು   ಮತ್ತೆ ನಾನು 

ತಂದೆ ರೂಪವು ನೀನೇ ಎಂದು 

ಕಂಡೆ ನಾನು ಮೇಲೆ ನಿಂದು 

ಅದುವೇ ಭಾವ ಅಲ್ಲವೇನೆ 

ತಾಯಿ ವಾರಾಹಿ 

ತಾಯಿ ವಾರಾಹಿ 


ಕೆಂಪು ಮಾಲೆ ದೊಡ್ಡ ಕಾಲು 

ನೋಡಬಲ್ಲೆನೇನೆ ಮುಖವ 

ಆ ಕಣ್ಣು ಉಗ್ರ ರೂಪ

ಇದು ಮಹಾ ಸ್ಮಶಾನವಂತೆ 

ಕತ್ತಲೆಯಲಿ  ಕಾಯುವವಳು ನೀನಂತೆ 

ಬೆಳಗಿನಲ್ಲಿ ಬರುವನಂತೆ 

ಆ ಕಾಲ ಭೈರವನು 

ಇಲ್ಲಿನ ಕೊತವಾಲನು 

ಏನು ಬೇಕು ಹೇಳೆ ತಾಯೆ 

ಬಳಲಿರುವೆ ನೀನು ತಾಯಿ 

ಈ ಹಗಲು ಮಲಗು ತಾಯೆ 

ಜೋ ಜೋ ವರಾಹಿ ತಾಯಿ 

ಜೋ ಜೋ ವರಾಹಿ ತಾಯಿ 

ಬಚ್ಚಿಡುವೆ ತಾಯೆ ನಿನನು 

ಯಾವ ಬೆಳಕು ಬೀಳದಂತೆ 

ಯಾವ ಶಬುದ ತಾಕದಂತೆ 

ಯಾರೂ ಬಾರದಂತೆ 

ಮಲಗು ತಾಯಿ 

ಜೋ ಜೋ ವರಾಹಿ 

ಜೋ ಜೋ ವರಾಹಿ


ಅನುತ್ತರ

 [ಅನುತ್ತರ : ಗುರು ಅಭಿಧ ಜೊತೆ ಅನುಭವಿಸಿದ ಅನುಭವವಿದು. ಬರೀ ಅನುಭವಗಳು. ಒಂದೊಂದೂ ಸ್ವತಂತ್ರ್ಯವಾದದ್ದು, ಸೇರಿಕೊಂಡದ್ದು, ಹಾಗೇ ಉಳಿದದ್ದು. ]

೦೧. 

ಆ ಕಲ್ಲು - ಚಪ್ಪಟೆ ಕಲ್ಲು 

ಓಡಿ ಬಂದು ಬಿದ್ದಾಗ 

ಕಣ್ಣು ತೆರೆಯಿತು 

ಕೆಂಪು ಕಣ್ಣು ತೆರೆಯಿತು 

ಬೆಳಕು ಹೊತ್ತಿತು 



೦೨. 

ಸರಿದಿಲ್ಲ ಅವಳು 

ಮೂರೂ ಎಚ್ಚರದೊಳಗೂ ಹೊರಗೂ 

ಒಮ್ಮೊಮ್ಮೆ ಒಂದೊಂದು ರೂಪ 

ಮನೆಯಲ್ಲಿನ ವಿಗ್ರಹ ಮಾತಾಡುತ್ತಿದೆ 

ಅಲ್ಲ ಸಂಭಾಶಿಸುತ್ತಿದೆ 

ಮಾತನಾಡದೆ ಹೋದಾಗ ಕೋಪವೆಂದೆನಿಸಿದ್ದೂ 

ಧ್ಯಾನಕ್ಕೆ ಕೂತವಳ ರೂಪವೊಮ್ಮೆ 

ಕಣ್ಣು ಮೇಲಕ್ಕೆ ನೋಡುತ್ತಿತ್ತು 

ಆ ಧ್ಯಾನದಲ್ಲಿ 


೦೩. 

ಈ ರಾತ್ರಿ ಕೂತಿದ್ದದ್ದು 

ಯಾವುದೋ ಶವದ ಮೇಲೆ 

ನನ್ನ ಶವವೇ ಆದೀತು ಮತ್ತೆ 

ಬೆತ್ತಲೆ ಶವದ ಮೇಲೆ ಬೆತ್ತಲೆ ಯೋಗಿ 

ಮನೆ ಸುತ್ತ ಮುತ್ತ ಎಲ್ಲಾ ಸ್ಮಾಶಾನ 

ಎದುರಿಗೆ ಕಾಲಿಯಿದ್ದಾಳೆ 

ಘೋರ ಕಾಲಿಯಾದರೋ 

ಕಡುಕಪ್ಪಾದರೋ 

ರಕುತ ಉಕ್ಕುವ ರುಂಡಗಳೊಡನಿದ್ದರೂ 

ರುಂಡ ಮಾಲೆಯ ರಕುತ 

ಮೈಯಲ್ಲಾ ತೋಯ್ದಿದ್ದರೂ 

ನಗುಮುಖದ ಸುಂದರಿಯವಳು 

ತ್ರಿಪುರ ಸುಂದರಿ 


೦೪. 

ಚಂಡಿ, 

ಬಗೆ ಬಗೆಯ ಭಾಷೆ ನೀ

ಅದರೊಳಗಿನ ನಾಧ ನೀ 

ಅಭಿಧಾ ಶಕ್ತಿಯು ನೀ 

ನಮ್ಮಗಳ ಮಾತು 

ನಮ್ಮಗಳ ಮೌನ 

ಎರಡೂ ಭಾಷೆಯೇ 

ಜಗವೆಲ್ಲಾ ಬರೀ ಭಾಷೆ 

ಹಾಗೂ ಆ ಭಾಷೆಯೇ ನೀನು ಚಂಡಿ 


೦೫. 

ಮತ್ತೆ ಮತ್ತೆ ಮುನ್ನುಡಿ ಬರೆಯುತ್ತಿರಬೇಕು 

ಕವನಕ್ಕೆ ಬರಹಕ್ಕೆ ಬದುಕಿಗೆ 

ಬಕುತಿಗೂ ಬೇಕು ಮುಕುತಿಗೂ ಬೇಕು 

ಮುನ್ನುಡಿ ಬರೆಯುತ್ತಿರಬೇಕು 

ನೆನಪಲ್ಲವದು ಇರುವುದಲ್ಲಿ 

ಕೇಳಿಸಿಕೊಳ್ಳಬೇಕು ಕಿವಿ ಮುಚ್ಚಿ 

ನೋಡಬೇಕು ಕಣ್ಮುಚ್ಚಿ 

ತಾಕಬೇಕು ಕೈ ಹಿಡಿಯಬೇಕು 

ಬೆಚ್ಚಗಿನ ಬಿಸಿ ತಾಗಬೇಕು 

ಆ ಆಳದಲ್ಲಿದೆಯದು ಸ್ಪಂದ 

ಸಾದಾರಣ ಸ್ಪಂದ 

ತಾಕಬೇಕು ಕೇಳಬೇಕು ನೋಡಬೇಕು 

ಅದ ಹಾಡಬೇಕು 

ಅದು ಬೇಕು ಜಗಕೆ 

ಹಾಗೆ ಕೇಳಿದ ಹಾಡು ಬೇಕು 

ಸಾದಾರಣ ಸ್ಪಂದವದು 

ಎಲ್ಲರ ಪಾಡದು 

ಎಲ್ಲರ ಹಾಡದು 


೦೬. 

ಕವನ ಮಹಾಕಾರುಣಿ 

ಅರ್ಥ ವಸ್ತು ಧ್ವನಿ ಅಲಂಕಾರ 

ವ್ಯರ್ಥ ಪ್ರಲಾಪವಷ್ಟೆ 

ಯಾರೋ ಏನೋ ನೆನೆದದ್ದನ್ನು 

ಬಯಸಿದ್ದನ್ನು ನೊಂದದ್ದನ್ನು 

ಕೇಳುವುದು 

ಕೇಳಿ ಬರೆಯುವುದಷ್ಟೆ 

ಉಳಿದದ್ದೆಲ್ಲವೂ ಬರೀ ಪದಗಳು 


೦೭

ಭಾಗ ವಿಭಾಗದ ಭಾರವೇ 

ಜೀವವ ಹೂತಿದೆ ಆಳದಾಳಕ್ಕೆ 

ಬರೀ ಮೇಲ್ಪದರದಾಟವದು 

ಚಪ್ಪಾಳೆ ಹೊಡೆದಂತೆ ಜೋರು ಕೇಕೆಯಂತೆ

ಬೆಡಬೇಕು ಹೀಗೆ ಸುಮ್ಮನೆ ಕಟ್ಟಿದ ಗೋರಿಗಳ 


೦೮. 

ಅದಕೆ ಇಚ್ಛೆಯಾಯಿತು 

ಅದುವೇ ಇಚ್ಛೆಯಾಯಿತು 

ಆ ಇಚ್ಛೆಯೇ ಕಾಲವಾಯಿತು 

ಆ ಕಾಲವೇ ಇಚ್ಛೆಯಾಯಿತು 

ಅದುವೇ ಹಬ್ಬಿತು 

ಹಬ್ಬಿದ್ದೇ ಅದಾಯಿತು 

ಆಗುವುದೇನದು ಏನೂ ಇಲ್ಲ 

ಆದದ್ದೆಲ್ಲಾ ಇರುವುದೇ ಅಲ್ಲ 

ಅದೇ ತ್ರಿಪುರ ಸುಂದರ ಕಾಲಿ 

ಏನೂ ಇಲ್ಲದ್ದು ಇರುವುದೆಲ್ಲವೂ ಆದದ್ದು 

ಅನುಭವಿಸಿದ್ದು ಅನುಭವದ್ದು 

ಅದು ಅದರದ್ದು 

ಅದೇ ಅದು 


೦೯. 

ಬಿಂದುವಿನಿಂದೆಲ್ಲಾ ಬಿಂದುಗಳು 

ಒಂದೊಂದಾಗಿ 

ದೇಶಕಾಲ ವಸ್ತು ಪದಾರ್ಥ 

ಅದುವೇ ಆಗಿ 

ಹಿಗ್ಗುವುದೂ ಅದೇ ಕುಗ್ಗುವುದೂ ಅದೇ 

ತೆರೆದಿದ್ದು ಇಲ್ಲಿ ಈ ಮಧ್ಯದಲ್ಲಿ 


೧೦ 

ಅವಳು ಬಂದಳು 

ಬಾಲೆಯಾಗಿ ಮೊದಲು 

ಸೊಂಟದಮೇಲೆ ಕೈಯನಿಟ್ಟು 

ಪುಟ್ಟ ಲಂಗವನ್ನು ತೊಟ್ಟು 

ಜಗದ ನಗುವೆಲ್ಲಾ ತಾನೇ ಏನೋ ಎಂದು 

ಬಂದಳು ಬಾಲೆ ಬಂದಳು 


ಮುಡಿಯ ಬಿಚ್ಚಿದವಳವಳು 

ಸುಂದರಕೆ ಅತಿ ಸುಂದರಳವಳು 

ಕಡು ಕೆಂಪು ತಾವರೆ ಮೊಗ್ಗ ಹಾರದವಳು 

ಆದಳು ನೋಡ ನೋಡುವಂತೆ 

ಉರಿವ ಬೆಂಕಿ ಎಲ್ಲೆಲ್ಲೂ 

ಮುಡಿಯಲ್ಲ ಜಡೆಯಲ್ಲವದು 

ಉರಿವ ಬೆಂಕಿ ಕಿಡಿಗಳು ಮತ್ತೆ 

ರುಂಡ ಹಾರ ಕೆಂಪು ಮುಖವು 

ಉರಿವ ಕಡು ಕಪ್ಪು ಮುಖವು 

ಉಗ್ರ ನೇತ್ರ ಬಿಳಿಯ ಜ್ವಾಲೆ 

ಮೈ ಹತ್ತಿ ಉರಿದಿದೆ 

ಎದೆಯ ಬಡಿತ ನಿಂತಿದೆ 

ಅವಳು ಮತ್ತೆ ಬಾಲೆಯಮ್ಮ 

ಪುಟ್ಟ ಲಂಗ ತೊಟ್ಟ 

ತುಂಟ ನಗೆಯ ಪುಟ್ಟ 

ಬಾಲಳಮ್ಮ ಅವಳು ಪುಟ್ಟ ಬಾಲಳಮ್ಮ 



ಅನುತ್ತರ

 

ಬಂದಂದಿನಿಂದ ಇದ್ದಲ್ಲೇ ಇದ್ದ

ನಾಗಮಲ್ಲಿಗೆ ಮರ

ಹಚ್ಚ ಹಸಿರಾಗಿ

ಬಿಳೀ ಹೂವ್ಗಳಾಗಿ

ಬೆಳಗಾದದ್ದೇ

ಕಡು ಕೆಂಪಾಗಿದೆ


ಹೂ ಉದುರಿದೆ

ನಾಗರ ಸದ್ದು

ನಾ ಹೂವಾಗಿದ್ದೇನೆ

ನೀ ಮುಡಿಯಬಹುದು

ಅಥವಾ

ಹೊಕ್ಕುಳಿಗಾಕಿಕೊಳ್ಳಬಹುದು

ಬೇರಿಳಿದು ಒಳಗೆ

ನಾಗಮಲ್ಲಿಗೆಯಾದೀತು

ಎಷ್ಟಾದರೂ

ಉದರದೊಳಗೆ ಬ್ರಹ್ಮಾಂಡವನ್ನೇ

ಇಟ್ಟುಕೊಂಡವಳಲ್ಲವೇ